„ახალგაზრდების სამეწარმეო შესაძლებლობების მხარდაჭერა საქართველოში“ საქართველოს ახალგაზრდა ეკონომისტთა ასოციაციის შვილობილი კომპანიის „ბიზნეს საკონსულტაციო ქსელი საქართველო“-ს პროექტია, რომელიც ესტონეთის საგარეო საქმეთა სამინისტროსა და ამერიკის შეერთებული შტატების სახელმწიფო დეპარტამენტის მიერ არის დაფინანსებული. გასულ წელს, აღნიშნული პროექტის ფარგლებში 14-მა ბიზნეს პროექტმა მოიპოვა დაფინანსება. მათ შორის იყო პროექტი „აგრო პროდუქტების წარმოება“.

      “თავდაპირველად პროექტის შესახებ ჩემი მეგობრისგან შევიტყე. ჩვენ 2013 წლიდან დაარსებული გვქონდა კომპანია ეი პი ჯი და ვაწარმოებდით სოფლის მეურნეობის პროდუქტებს: კიტრს, პომიდორს, მწვანე სალათს, ბულგარულ წიწაკას, ბროკოლს და სხვ. ჩვენი ბიზნესის სეზონურობა პრობლემებს გვიქმნიდა მიწოდების მდგრადობის კუთხით, ხოლო სათბურის გასაკეთებლად საკმარისი ფინანსური რესურსი არ გაგვაჩნდა. ამიტომ გადავწყვიტეთ მონაწილეობა მიგვეღო პროექტში და დაფინანსების შემთხვევაში გაგვეკეთებინა სათბური, სადაც მოვიყვანდით აისბერგის ჯიშის მწვანე სალათს.

    გრანტის მიღებამ მნიშვნელოვნად შეცვალა ჩვენი ბიზნესი, ახლა გვყავს მუდმივი კლიენტები, რომელთაც შეუფერხებლად ვაწვდით პროდუქციას წელიწადის ყველა დროს. ამჟამად წარმოებაში 3 მუდმივი და 10-მდე დროებითი თანამშრომელია დასაქმებული, მათ შორის 7 ქალბატონი. რომ არა ბიზნეს გრანტი მხოლოდ ჩვენი რესურსებით სათბურის გაკეთება დროში ძალიან  გაგვეწელებოდა.

  ახალგაზრდებს, რომელებიც გეგმავენ საკუთარი ბიზნეს საქმიანობის დაწყებას ვურჩევდი, რომ დეტალურად დათვალონ ყველაფერი, დარწმუნდნენ მის მომგებიანობაში და მხოლოდ ამის შემდგომ დაიწყონ საქმიანობა.

ტარიელ გიორგაძე

„შპს ეი პი ჯი“-ს დამფუძნებელი