მაქვს პატივი გაცნობოთ რომ 2016 წლის 6 თებერვალს, საქართველოს ახალგაზრდა ეკონომისტთა ასოციაციაში (საეა) გაიმართა საერთო კრება, სადაც მოხდა გამგეობის წევრების არჩევა.   ახლად არჩეული გამგეობის პირველ სხდომაზე, საეა-ს გამგეობის თავმჯდომარედ დაინიშნა ბატონი მიხეილ ადეიშვილი, ხოლო აღმასრულებელ დირექტორად ბატონი კახა დაუშვილი.

ბატონმა კახამ დაამთავრა თბილისის სახელმწიფო უნივერსიტეტის ეკონომიკის ფაკულტეტი, ბაკალავრის ხარისხით (მაკროეკონომიკა). იგი უკვე ორი წელია მუშაობს საეა-ში პროექტების მენეჯერის თანამდებობაზე. მისმა ექსპერტულმა ცოდნამ, შრომისმოყვარეობამ და ერთგულებამ ჩვენი ასოციაციის მიმართ, ბატონი კახა გახადა ამ თანამდებობისათვის საუკეთესო კანდიდატი.

გამგეობისა და მენეჯმენტის ფარგლებში მომხდარი ცვლილებების მიუხედავად, ჩვენთვის უცვლელი რჩება ჩვენი ღირებულებები,  პარტნიორებთან ურთიერთობის ფასეულობები და მზად ვართ მოვახმაროთ ჩვენი დრო და ძალისხმევა პარტნიორ ორგანიზაციებთან წარმატებულ თანამშრომლობას. ჩვენი მიზანია განვამტკიცოთ არსებული კავშირები, ისევე როგორც დავაფუძნოთ ახალი ურთიერთობები გულწრფელ ნდობასა და ინტერესზე დაყრდნობით.

საქართველოს ახალგაზრდა ეკონომისტთა ასოციაციის მიზანია საზოგადოების ეკონომიკური განათლება, დემოკრატიის ხელშეწყობა და კერძო სექტორთან თანამშრომლობით, ქვეყნის ეკონომიკურ განვითარებაში წვლილის შეტანა. საეა არ დაიშურებს პროფესიონალიზმს, გამოცდილებასა და ძალისხმევას დასახული მიზნების მისაღწევად.